तुलसीपुर पुस १७
तुलसीपुर उपमहानगरपालिकाले सञ्चालनमा ल्याएको तुलसीपुर मेट्रो कलेजमा वन विज्ञानतर्फ स्नातक तहसम्मको कक्षा सञ्चालनका लागि प्रक्रिया अघि बढाइने भएको छ । लुम्बिनी बौद्घ विश्वविद्यालयबाट सम्बन्धन प्राप्त गरेर हाल कलेजमा कानुन विषय स्नातक तहसम्म पढाइ भइरहेको छ । विश्वविद्यालयका उपकुलपति प्राध्यापक डाक्टर हृदयरत्न बज्राचार्यले कलेजले वन विज्ञान विषय स्नातक तहसम्म कक्षा सञ्चालनका लागि तयारी रहेको अवस्थामा विश्वविद्यालयले सम्बन्धन दिनका लागि प्रक्रिया अघि बढाउन तयार रहेको बताउनुभयो ।
उपकुलपति बज्राचार्यले स्नातक तहसम्म वन विज्ञान विषय पढाउने कलेज यस क्षेत्रमा नभएकाले समेत स्नातक तहसम्म कक्षा सञ्चालन अनिवार्यजस्तै भएको बताउनुभयो । उहाँले कक्षा सञ्चालनका लागि आवश्यक जनशक्ति,भौतिक पूर्वाधारका लागि कलेजलाई तयारी अघि बढाउन आग्रह गर्नुभएको छ ।
कलेजका अध्यक्ष एवम तुलसीपुर उपमहानगरपालिकाका प्रमुख टीकाराम खड्काले आवश्यक पूर्वाधार र आवश्यक परेको अवस्थामा पाठ्यक्रम तयारीका लागि प्रक्रिया अघि बढाइने बताउनुभयो । उहाँले विश्वविद्यालयसंग समन्वय सहकार्य गरेर बौद्घ संस्कृतिको अध्ययन अनुसन्धानका कार्यहरुलाई अघि बढाउन तयार रहेको बताउनुभयो । कलेजका प्राचार्य वसन्त आचार्यले प्रविणता प्रमाणपत्र तहमा समेत वन विज्ञान विषय पढ्ने विद्यार्थीहरुले बाँके, बर्दिया राष्ट्रिय निकुञ्जमा पुगेर अध्ययन गर्ने गरेको बताउनुभयो । उहाँले तुलसीपुर उपमहानगरपालिकाभित्र एकसयभन्दा बढी सामुदायिक वन रहेकाले वन विज्ञान विषयको स्नातक तह कक्षा सञ्चालनका लागि प्रयोगात्मक अभ्यासका लागि समस्या सिर्जना नहुने बताउनुभयो । विश्वविद्यालयको सहकार्यमा कलेजले स्नातक तह कक्षा सञ्चालनका लागि विशेष कार्यक्रम समेत आयोजना गर्ने भएको छ ।
सम्बन्धित शीर्षकहरु
